Cabinet
Tu‘utu‘uni Sea fakataimi Falealeaˊ ke fakataha Hou‘eiki fakafofonga kuo filiˊ

Nuku‘alofa – Tokonaki 16 Tīsema 2017, 1:14pm: Kuo tu‘utu‘uni ‘a e Sea fakataimi ‘o e Falealea ‘o Tongaˊ, Lord Tangi ‘o Vaonukonukaˊ ke fakahoko ‘a e fakataha ‘o e Hou‘eiki fakafofonga kuo filiˊ ‘i he ‘aho Mōnite ‘aho 18 ‘o Tīsema 2017 ‘i he taimi 10 pongipongi ‘i he Falealea ‘o Tongaˊ.

Ko e fakataha eni ‘e tataki ‘e he Sea fakataimiˊ pea ‘e fakahoko ai ‘a hono fili ‘e he Hou‘eiki fakafofonga falealea kuo filiˊ ‘a e Palēmia Fili ‘e ua kuo fokotu‘u maiˊ.

‘E fakahā foki ‘a e hingoa ‘o e ongo kanititeitiˊ kae pehē kiate kinautolu na‘a nau fokotu‘u mo poupou ‘i hono fokotu‘u ‘i he fakataha ‘e fakahokoˊ.

‘I ha hili hono fili ‘a e Palēmia Filiˊ, ‘e hoko atu ai pē ‘a e fakatahaˊ ki hano fili ‘a e Seaˊ pehē ki he tokoni Sea ‘a e Falealea ‘o Tongaˊ.

‘Oku ‘atā ki he ngaahi kautaha ongoongo ‘oku nau fie fakamafola hangatonu ‘a e ngaahi polokalama ko eniˊ ke nau fakahoko atu ia pea ‘ikai ke ngata foki aiˊ kae mahino atu ki he kakaiˊ ‘o ‘ikai ke ngata pe ‘i Tonga ni kae pehē foki ki he ngaahi fonua ‘i tu‘apule‘angaˊ.

‘I he taimi tatau pē foki na‘e fakahā mei he ‘ofisi ‘o e Falealea ‘o Tongaˊ, ko e ongo fokotu‘u ‘e ua kuo a‘utaki angeˊ ‘a ia na‘e tāpuni foki ‘a e fokotu‘u kanititeiti ki he fili lakanga Palēmiaˊ ‘i he taimi haafe ‘a e nimaˊ ‘o e efiafi Tu‘apulelulu ‘aho 14 ‘o Tīsemaˊ pea pehē foki na‘e ‘osi mahino pē mei mu‘a ko e ‘aho ia ‘e tāpuni ai ‘a e fokotu‘u kanititeitiˊ pea ‘i he Konisitūtoneˊ mo e ngaahi lao ko ia ki he fili ‘a e Palēmiaˊ, ko e taimi ko ia pe ko e ‘aho ‘e ngata ki ai ‘a e fokotu‘u kanititeitiˊ ‘e lau leva mei ai ‘a e ‘aho ‘e tolu pea fakahoko leva ‘a hono uiaki ko ia  ‘a e fakataha‘angaˊ, ‘a ia ko eni ‘oku uiaki ki he ‘aho Mōnite ‘aho 18 ‘o Tīsemaˊ.

Kaikehe neongo foki ‘e toki fakahoko mei he ‘Eiki Sea fakataimi ‘o e Falealeaˊ ‘a e fakaikiiki ki he ongo fokotu‘u kanititeiti ki he lakanga Palēmia filiˊ, ka ‘oku foki ‘e he ongoongoˊ ‘a e ngaahi fakamatala falala‘anga ko e ‘uluaki fokotu‘uˊ na‘e fakahū atu ia ‘i he ‘aho 5 ‘o Tīsemaˊ ki he Falealea ‘o Tongaˊ, ko e ‘Eiki Palēmia lolotongaˊ, Samiuela ‘Akilisi Pōhiva.

Ko e fokotu‘u kanititeiti fika uaˊ leva na‘e fakahū atu ia ‘i he ‘aho Tu‘apuleluluˊ ‘a ia ko Siaosi Sovaleni ka ko e fakafofonga falealea lolotonga ki he vāhenga Tongatapu fika 3.

Kaikehe neongo ‘e toki fakahā mo e ngaahi fakaikiiki kehekehe ko iaˊ, kae tuku pē ki he ongoongo ni ke ne ‘oatu ‘a e puipuitu‘a ki he ongo kanititeiti ko eni kuo fokotu‘u ki he lakanga mahu‘inga ke fai mei ai hono fili ‘o e ‘Eiki Palēmia Filiˊ ‘e he Falealea ki he vaha‘a taimi 2018-2021, ‘i hono fakahoko atu ‘e Katalina Tohi.

print

About the author

Leave a comment

Your email address will not be published. Required fields are marked *

WP-Backgrounds Lite by InoPlugs Web Design and Juwelier Schönmann 1010 Wien