Thursday, 23/3/2017 | 4:19 UTC+13
TDN

Huufi ‘e he ‘Ene ‘Afio´ Hotele Tanoa

Ko e maka ‘o e Hotele hili hono tatala ‘e he Tama Tu’i

Nuku‘alofa – Falaite 17 Fepueli 2017, 11:02am: Na‘e huufi foki ‘a e Hotele Fakavaha‘apule‘anga ko ia ‘oku fetu‘u ‘e faa pe ko e 4 Stars ‘oku ‘iloa ko ia ko e Tanoa International Dateline Hotel ‘e he ‘Ene ‘Afio´, Kingi Tupou VI ‘i he taimi hoko ‘a e 2 efiafi ‘aneafi´.

Ko e kau fakaafe tokolahi ‘aupito mei he ngaahi fonua kehekehe mei muli, Nu‘usila, ‘Amelika, ‘Aositelelia kae pehee ki Fisi ‘i he‘enau lava mai ‘o kau ‘i hono fakaava ‘o e Hotele ni.

Ko e Hotele ‘aki foni eni hono 10 ‘a e Kautaha ko e Reddy Business Association, ha‘a nautolu ko ia ‘a e ‘u Hotele ‘oku ‘iloa ko e Tanoa.

Na‘e kau mai foki ‘i he kau lea talitali´ ‘a Shane Jones, ko e taki ia mei he timi faka‘ekonomika mei Nu‘usila ne nau lava mai´ kau ai mo e Kovana Seniale maloloo ko ia ‘a Nu‘usila ko Sir Annand.

‘I he lea ko ia ‘a Shane Jones, na‘a ne polepole ‘aki ‘a ‘enau sio ko ia kuo a‘u ‘a Tonga ni ki he tu‘unga ma‘olunga ‘aupito he tu‘unga faka-hotele ko ia ‘a mamani´, he ‘oku nau fakamo‘oni‘i he ‘oku ‘i ai ‘a e Hotele ‘a e kautaha ni ‘i Nu‘usila, ‘i ai mo e ngaahi Hotele ‘i Fisi pea pehee ki Ha‘amoa pea ko e Hotele fakamuimui´ eni ‘i Tonga ni.

Pea ko ‘enau poupou mo ‘enau ‘ilo ko ia e puipuitu‘a ko ‘enau ‘i heni´ ko e kakai ‘ilo ki he ‘ekonomika´, ko e taha eni ia he ‘inivesi lelei mo‘oni kuo fai ‘e he pule‘anga Tonga´.

‘I he me‘a ko ia ‘a e ‘Eiki Palemia´, ‘Akilisi Pohiva, na‘a ne hanga ‘o fakamatala ai ko e taha eni ‘a e ngaue na‘e tokanga ‘aupito ki ai ‘a e pule‘anga lolotonga´ he ‘enau hu atu ko ia ki he pule‘anga´ pea ko e taha ‘enau ngaue na‘e fai´, ko nono fakama‘a ko ia ‘a Nuku‘alofa´ pea kau ai hono teuaki ko ia ke toe langa mo fakalelei‘i ‘a e Hotele´ ‘o nau monu‘ia ‘i he ma‘u ‘a e kautaha Tanoa ‘i Ma‘asi 2015, ke nau fakahoko atu hono langa ko ia ‘o e Hotele ko eni´.

Kaikehe ‘i he‘ene me‘a´ na‘a ne pehee ai ‘oku ‘i ai ‘a e talamonuu ko ia ki he kauataha ni pea pehee foki ki he fengaue‘aki vaofi ‘aupito, feinga ‘a e pule‘anga´ mei he tafa‘aki ‘a nautolu´ ke fa‘u ha ‘atakai ‘oku fakafiemalie ki he kau ‘inivesitoa ko ia mei muli´ ‘o ‘alu atu ai pe ia ‘o pehee ‘e kau ‘a e Hotele ko eni´ ki hono tokanga‘i ko ia ‘a e kau sipoti tokolahi te nau folau mai ki he sipoti ko ia ‘o e 2019.

‘I he lea fakamalo ko ia ‘a e Talekita Pule ‘a e kautaha ni, Rohit Reddy, na‘a ne pehee ai ko e ngaue lahi ne fai heni´ pea ne ‘ikai ke ‘i ai ha‘anau ‘amanaki te nau malava ‘o fakalelei‘i he ko e ngaue faingata‘a hono liliu ko ia ‘a e ‘uluaki tu‘unga na‘e ‘i ai ‘a e Hotele´ ki he tu‘unga ‘i he taimi ni´.

Na‘a ne fakahaa ko e me‘a pe ‘oku nau fiefia ai´ ‘oku ma‘u ngaue ai ‘a e toko 80 tupu mei Tonga ni kae’uma‘a muli pea ko ‘enau hanga ko ia ki he kaha‘u´, ko e taha eni he Hotele ‘e hoko ko e fetu‘u ia ‘i Tonga ni.

print

About

POST YOUR COMMENTS

Your email address will not be published. Required fields are marked *

WP-Backgrounds Lite by InoPlugs Web Design and Juwelier Schönmann 1010 Wien