Local
Hoko ‘a Lola Koloamatangi ko e pataloni likuluti hono 44 e Polisi´

Nuku‘alofa – Falaite 19 Mē 2017, 4:27pm: ‘E kamata ngāue ‘a e kau Polisi akoako fo‘ou ‘e toko 29 hili ia ‘enau fakakakato e ako nofoma‘u uike ‘e 26 ‘i he ‘apiako Polisi´ ‘i Longolongo, ko e konga ‘uluaki ia ‘enau ako ke nau hoko ko e ‘ofisa polisi Tonga.

Na‘e fakahoko e tānakitu’unga ‘a e fānau ako ni ‘o foaki ‘e he Minisitā Polisi´, Māteni Tapueluelu, ‘enau ngaahi tohi fakamo’oni ako´ pea mo e ngaahi me‘a‘ofa ki he kau tu’ukimu’a´.

Ko e likuluti fika 44 foki eni ‘a e kau akoako ki he Polisi Tonga´ pea na‘a nau hoko ai ko e fuofua likuluti ia ke fakahingoa pe ui ki ha taha e kau ‘ofisa mālōlō mei he Potungāue´.

Ne ui e likuluti ko eni´ ko e Lola Baker Koloamatangi Recruit Wing 44 pea hoko ai ‘a Lola ko e pataloni ‘a e kau hū ko eni´.

Na’e pehē ‘e he Komisiona Polisi´, ko e fatongia ‘o e pataloni ki he kau hū ko eni´, ‘oku hoko ia ko e taki mo e fakatātā kia nautolu ‘aki ‘ene tokoni kia nautolu ke nau ako e mo’ui fakapolisi´.

Na’e fakamālō foki ‘a Lola ki he tokolahi ‘a e fānau fefine na‘e kau he likuluti ko eni´.

Na‘e lava‘i lelei pea tānakitu‘unga ai ‘i he likuluti ko eni´ ‘a e fānau fefine ‘e toko 16 mo e fānau tangata ‘e toko 15.

Na‘e fakahā foki ‘e he Minisitā Polisi´ ‘i he‘ene lea ko e fakaafe fakalangilangi ‘o e ‘aho´, ‘a ‘ene hoha’a ki he lahi ‘a e faito’o konatapu ‘oku ‘asi ‘i Tonga ni´ pea pehē ki hono fakatotolo’i´.

Na’a ne pole ai ki he kau ako ne tanakitu’unga´ ke nau manatu’i ‘a e ‘aho ne ‘osi ai ‘enau ako´, ke nau fakahoko ke a’u honau fatongia´ ‘o ‘oua e filifilimānako pea ‘oua ‘e fakatau ‘enau fakahoko fatongia´.

Na‘e po’uli foki ‘oku kei lele pē ‘a e kātoanga´, pea ne toloi ai ‘a e konga faka’osi ‘a e polokalama´, ‘a e laka faka’osi ‘a e konga kau ko eni´, ke toki fai he haafe ‘a e hiva´ ‘aneuhu.

print

About the author

Leave a comment

Your email address will not be published. Required fields are marked *

WP-Backgrounds Lite by InoPlugs Web Design and Juwelier Schönmann 1010 Wien