Wednesday, 26/4/2017 | 2:11 UTC+13
TDN

Fakama‘ala‘ala kaveinga Taa mo e Fakamamahi´ ke toe mahino ange ki he Hou‘eiki Tangata´

Nuku‘alofa – Tu‘apulelulu 16 Ma‘asi 2016, 2:55pm: Ko hono tufaki ke ma‘ala‘ala ange ‘a e kaveinga fakamamani lahi ki he taa mo e fakamamahi ‘o Fafine ‘i ‘api´ pe Domestic Violence, ‘oku ‘i ai ‘a e falala atu ko e Hou‘eiki tangata´ ‘e malu mo hao ai ‘a Fafine mei he fakaehaua ko eni´, ka mahu‘inga malie ange kiate kinautolu ‘a e kaveinga ko eni´ mo e Lao´.

‘Oku taketi‘i foki ‘a e talanoa‘i ‘a e kaveinga ko eni´ mo e Hou‘eiki tangata´ ‘i he ngaahi ha‘ofanga kehekehe mei he ngaahi akoa‘anga´ ki he ngaahi kalapu kava-Tonga´ ‘o hange ko e takai ‘oku fai ‘e kinautolu ‘a e kau ngaue ki he va‘a ‘a e kakai fefine ‘a e Potungaue ki he ngaahi ngaue Fakalotofonua´.

Na‘e fakahaa foki ‘e he ‘ofisa fakahoko ngaue ki he Lao malu‘i ‘o e Famili´, ‘Ofa ki Haileni Tolu, na‘e toki hoko pe eni ‘o Lao ‘i he 2014, pea ‘oku tapu ai ‘a e taa mo e fakamamahi‘i ‘o fafine ‘i ‘api´.

Kaikehe ko ‘ene fakamatala eni ki he fakahoko ngaue ‘oku nau fai hono muimui’i´.

“Na‘a mau lava atu ki he Kolisi Tonga´ ‘aneafi mo e kaveinga ko eni´ pea mau sio ai ki he’enau tokanga ‘aupito ki he tali fehu‘i ‘i he ngaahi fehu‘i na‘a mau tuku atu felave‘i mo e fakamamahi ‘i ‘api´, ‘oku mahino ‘aupito ‘enau tokanga ki he palopalema ko eni´ mo ‘enau kau mai koee hono talanoa‘i´ pea ‘oku mahino ‘aupito ia ‘oku ‘i ai ‘a e tokolahi ia ‘oku nau ‘ilo ko e palopalema eni ‘oku hoko pea ‘oku nau loto ke fai hono tokangaekina´.

Na‘a mau fiefia ‘aupito he mau oo ko ia ‘aneafi´, na‘a mau lava atu ai mo ‘emau fanga ki‘i naunau ko e fakamatala pee mo e naunau ‘e malava ke nau ako mei ai pea na‘a mau lava atu ‘o tufa eni ‘o oo mo e fanau´.

Ka ko ‘emau sio ko ia ‘aneafi´, ‘oku nau malava ‘o fakafelave‘i pe mo e kaveinga ne mau lele atu ai´ ‘a ia kuo lava ‘a ‘Atele pea na‘a mau faka‘amu ki Toloa ka ‘oku mau fakaangaanga atu eni ki ‘Apifo‘ou.”

Na‘e fakahaa foki ‘e ‘Ofa ‘a ‘ene vakai ko ia ki he‘enau ngaue´, ‘oku fiefia ‘aupito ‘a e ni‘ihi ke nau fanongo tokolahi pea ‘oku nau kau mai ki he fepotalanoa‘aki ko ia ‘oku fai´ he ‘oku mahino ‘oku nau ‘ilo ‘oku ‘i ai ‘a e palopalema pea ‘oku totonu ke fai ki ai ‘a e tokanga.

Na‘a ne fakahaa foki ‘oku nau talanoa ki he ngaahi uesia ‘o e fakamamahi´ he ‘oku ‘ikai ko e fakasino pe ‘a e ngaahi fakamamahi´ ka ‘oku ‘i ai ‘a e fakae‘atamai´ pea mo e tafa‘aki koee ki he pa’usi’i fakalielia´ ‘a ia ‘oku mahino ‘aupito ‘a e lahi ange hono tokangaekina´ he ‘oku a’lu pe ‘a e taimi´ mo e lahi ‘a e ni‘ihi ‘oku hoko tonu ki ai ‘a e fakamamahi´ pea ‘oku lava ke talanoa‘i pea lava ke ‘ohake ‘i he ngaahi fakataha‘anga koee ‘oku nau oo holo ki ai´.

“Teu fakataataa pe, ko e Falaite kuo ‘osi´, na‘a mau lava atu ki he Kalapu Siaafu´ he na‘e ‘osi fai ‘emau ki‘i polokalama ke mahino ko e mahu‘inga ko e malu ‘o e kakai fefine´ ‘e tefito ia mei he Hou‘eiki tangata´ pea ne ‘osi fai ‘emau ki‘i takai ki he kalapu´ he 2015 ko e ‘uhinga´ he ko e feitu‘u ia ‘oku lahi taha ai hono ma‘u ‘a e Hou‘eiki tangata´, pea fanongo ai ‘a e Talafekau lahi ‘a ‘Aositeleelia´ pea kole mai leva ‘e ia ha faingamalie pe ‘e lava ke mau foki ki he Kalapu Siaafu´ ko ‘ene fiema‘u ke ‘alu ‘o fai ha‘ane lea kiate kinautolu pea na‘e lava ‘i he ‘aho Falaite kuo ‘osi´.

Ko e fiefia lahi ‘a e Talafekau Lahi´ he faingamalie na‘a ne ma‘u´ mo ‘ene lava koee ‘o talanoa ki he Hou‘eiki tangata ‘i he Kalapu Siaafu´ ‘I he kaveinga ni.”

Na‘e pehee foki ‘e ‘OFa ‘oku nau hanga atu eni ‘i he‘enau ngaahi polokalama ngaue ‘i tu‘a´ pe ko ‘enau  polokalama fakataukei makehe ki he ni‘ihi ‘i he ngaahi va‘a ‘oku nau ngaue hangatonu ‘o fakahoko ‘a e Lao´ ‘o hange ko e kau Polisi´, ko e Potungaue Mo‘ui´, ko e Senitaa ‘oku nau tokanga‘i ‘a e kakai fefine ‘oku nau mo‘uatamaki ko ia hono fakamamahi‘i´ ‘o mahino ‘oku fakahoko lelei ‘a e Lao ko eni´.

‘E lava atu ‘a ‘Ofa mo ‘ene va‘a ngaue´ ‘i he po‘uli hifo ‘a e ‘aho ‘apongipongi´, Falaite 17 ‘o Ma‘asi´ ‘o fakahoko ‘enau polokalama talatalanoa´ mo e Kalapu Huolanga´ pea ko e efiafi Pulelulu´ leva mo e Kalapu Fofo‘anga ‘i loto Nuku‘alofa´.

print

About

POST YOUR COMMENTS

Your email address will not be published. Required fields are marked *

WP-Backgrounds Lite by InoPlugs Web Design and Juwelier Schönmann 1010 Wien