Wednesday, 26/4/2017 | 2:09 UTC+13
TDN

‘Amanaki ke Huufi ‘E he ‘Ene ‘Afio´ ‘a e Hotele Tanoa

Nuku‘alofa – Tu‘apulelulu 16 Fepueli 2017, 10:08am: ‘E huufi ‘e he ‘Ene ‘Afio´, Tama ko Tupou VI, ‘a e Tanoa International Dateline Hotel ‘i he taimi 2 ‘a ho‘ataa.

Ko e fakatu‘amelie ki he tafa‘aki ko ia ki he folau‘eve‘eva´ mo e Takimamata ‘a Tonga´, ko e taha ‘o e ngaahi tefito makatu‘unga ia ‘i he amanaki ke huufi ‘a e Hotele´.

Kuo lava lelei foki ‘a e ngaue fakalelei mo e fakafo‘ou ki he Hotele´ ‘i he ta‘u e ua kuo ‘osi´ pea ko e fakahoko foki ‘e he Kautaha ha‘a nautolu ‘a e ngaahi Hotele Tanoa ‘a ia ko e Kautaha eni ‘i Fisi.

Kaikehe, na‘e ‘uluaki langa foki ‘a e Hotele´ ‘i he ta‘u 1964 pea ‘oku ‘osi lave‘i pe ‘a e hingoa na‘e lele mai ‘aki ‘e he Hotele´, ‘a e Dateline International Hotel ‘a ia na‘e ‘i ai ‘a e ngaahi loki ‘e ‘24 ‘o lele mai ai ‘a e ngaahi ta‘u´ mo e ngaahi fakalelei ‘o a’u mai ko ia ki he 2015 kuo a’u ‘a e ngaahi loki fakakatoa ‘a e Hotele´ ‘o 126.

Ka neongo ‘a e ngaahi fakalelei ko eni´, na‘e kei fiema‘u pe ‘a e ngaue lahi ke toe hiki‘i hake ‘a e tu‘unga ‘a e Hotele´ mei he tu‘unga lolotonga na‘e lolotonga ‘i ai´, ‘o fai ai ‘a e fekumi ki ha kautaha ke nau fai ‘a e ngaue ko eni´ pea na‘e taki mu‘a ai ‘a e ‘Eiki Minisitaa Pa‘anga´.

Na‘e tuku ki tu‘a foki ‘a e ngaue ni ke tohi mai ki ai ha ngaahi kautaha te nau lava ‘o fakahoko ‘a e ngaue´ ‘o nga‘unu mai ai ko eni ‘a e kautaha Tanoa ‘o nau fakahoko ‘a e ngaue ko eni´ o a’u mai ai ko eni ki he ‘aho ni´, kuo tu‘u ‘a e Hotele´ ‘i he tu‘unga ma‘olunga ‘aupito pea mo faka‘ofo‘ofa foki.

Na‘e ‘osi fakaava fakalotofale pe foki ‘a e Hotele´ ‘i he ta‘u kuo ‘osi´ ‘i he Tama Pilinisi Kalauni´ ‘o lele mai ‘ene fakahoko fatongia´ ma‘ae kakai ‘o e fonua´ kae pehee ki he kau folau‘eve‘eva´ pea ko e ‘aho ni eni ‘e fakahoko leva ai hono huufi faka‘ofisiale´.

Na‘e fai ‘a e faka‘eke‘eke ‘a e ongoongo ‘a e letio 87.5 mo e pule ‘oku ne tokanga‘i mo hono fakalele ‘a e kau ngaue ‘a e Hotele´, Tupou ‘Ahome‘e Faupula, ‘one ‘omai ‘a e tu‘unga ‘oku ‘i ai ‘a e mateuteu ‘a e Hotele´ ki hono faka‘ofisiale‘i ‘ene fakahoko fatongia ma‘ae fonua´.

print

About

POST YOUR COMMENTS

Your email address will not be published. Required fields are marked *

WP-Backgrounds Lite by InoPlugs Web Design and Juwelier Schönmann 1010 Wien