Wednesday, 26/4/2017 | 2:15 UTC+13
TDN

Tokoni pule‘anga Siapani´ fakalokiako fo‘ou Lautohi Upper Room

Nuku‘alofa – Falaite 21 ‘Epeleli 2017, 4:58pm: Kuo ta‘imālie ‘a e longa‘i fānau ‘a e Lautohi pule‘anga Upper Room ‘i Ha‘ateiho´ ‘i he tokoni ‘a e pule‘anga Siapani´ ki hono langa ‘a ‘enau ngaahi lokiako fo‘ou ‘a ia na‘e huufi ‘aneafi ‘e he ‘Amipasitoa Siapani´, HE, Mr. Yukio Numata.

Ko e fakamole ki he langa ko eni´ na‘e fe‘unga ia mo e $185,795.00 ‘a ia ko e fo‘i fale ‘oku ‘i ai ‘a e lokiako ‘e fā.

Na‘e fakahā foki ‘e he tangata‘eiki ‘Amipasitoa´ ‘a ‘ene fiefia ‘i he‘ene vakai ki he kakato ‘a e ngāue ki he langa ‘o e ngaahi lokiako ma‘ae fānau lautohi Upper Room, tautautefito ‘i hono fakahā ‘e he poloseki ko eni´ ‘a e fengāue‘aki vāofi ‘a Siapani mo Tonga ni ki hono teke ‘a e mahu‘inga ‘o e ako ‘a e fānau´ fakatefito ‘i hono fakapapau‘i ‘a e kaha‘u ‘a e fanau´, ke ako ‘a e tokotaha kotoa pē.

“Malo e lelei fanau,

Ko hoku hingoa´, ko Yukio Numata. Ko au ko e ‘Amipasitoa ‘o Siapani ki Tonga.

 Oku fakafiefia aupito etau fakatahataha mai i he ahoni ke fakailongai a e kakato hono langa hoomou fale ako foou ni.

Ko e ngaahi lokiako ni ko e meaofa ia mei he kakai o Siapani, koe uhi ko enau mahuingaia i he ako, mo e vā faka-kaungāmea a hota ongo fonua.

Ofa lahi atu fanau.”

Na‘e fakahoko foki ‘a hono talitali ‘a e tokoni ko eni´ ‘e he Palesiteni ‘a e PTA ‘o e lautohi Upper Room ko ‘Anitoni Fetu‘u.

Ko e ako‘anga ni foki na‘e kamata pe ko e ako tokamu‘a ‘i he 2008 pea na‘e toki hoko pē ko e lautohi pule‘anga ‘i he ta‘u 2014 pea ‘i he ta‘u ni´ kuo ‘i ai ‘a e fānau ako ‘e toko 219 fakataha mo e kau ngāue ‘e toko 16.

Pea koe‘uhi´ ko e tokolahi ‘a e fānau ako´ mo e si‘isi‘i ‘a e lokiako´, na‘e fai ai ‘a e kumi tokoni ki he polokalama tokoni ko ia ‘a e pule‘anga Siapani´ ki he ngaahi Komiunitī mo e ngaahi ako‘anga´ ‘o nau monū‘ia ‘o fakahoko ai hono langa honau ngaahi lokiako´.

Na‘e me‘a ‘i he polokalama ni ‘a e Hou‘eiki Nōpele ‘o e vāhenga´ mo hono hoa´ pehē ki he Minisitā Leipa mo Tanaki Pa‘anga´, Pōhiva Tu‘i‘onetoa pea pehē pe foki ki he fakafofonga fefine ‘a e Falealea´, ‘Akosita Lavulavu mo e ni‘ihi kehe pe.

print

About

POST YOUR COMMENTS

Your email address will not be published. Required fields are marked *

WP-Backgrounds Lite by InoPlugs Web Design and Juwelier Schönmann 1010 Wien